مش كل حاجة عايزنها تحصل ....بتحصل

    مرة واحد قالى ان لما نحط حاجة في دمغنا احنا عايزنها تحصل وركزنا اوى ........ بتحصل

والعكس ..لو في حاجة مش عايزنها تحصل برضو مش هتحصل لو ركزنها انها متحصلش

   بصراحه ...مدخلش الكلام دماغى .. مقتنعتش يعنى ...حسيت بصراحه مع احترامى للشحص ان دة (هبل)

وبعد فتره كدة ..كنت في يوم مروحه البيت متأخر عن معادى , وكنت خايفه اوى خصوصا اننا كنا في الشتا

والتوقيت الشتوى دة مقلق بصراحه ....مش موضوعنا

فقررت فجأة انى جرب الحوار دة .... واعدت افكر واحط في دماغى ان بابا مش هيبقه في البيت ...وان ماما كمان هتبقه عند طنت جيجى جارتنا .... وانى هروح بقه من غير مشاكل هدخل ومن غير زعيق ولا خناق

وروحت وانا طول طريقى للبيت بركز اوووووووى ان محدش هيبقه موجود وبفتح الباب لقيت منار بتقولى

بابا ومما مش هنا ,,, ادخلى دخلى

        دة فعلا حصل .....غريبه !!!!!!

بابا فعلا مكنش موجود ولا ماما كمان ...بس مكنتش عند طنت جيجى كانت معاه

مش مهم ....المهم انى وصلت للى انا عايزاه ...وهنام من غير خناق

بس ....... وحسيت ان طاقه القدر اتفتحتلى ..وان الموضوع دة لو بيحصل فعلا مش مجرد صدفه

دة هيحللى مشاكل كتيـــــــــــر

ودوست بقه ....ف كل حاجة عايزاها تحصل اركز انه تحصل ...فتحصل

والى مش عايزاها تحصل ...متحصلش ....لدرجه انى اقتنعت انى

 بت جامدة بقه ومفيش زى

وفضلت فتره على الحال دة وسبحان الله كانت الحياه ميت فل وعشره وماشيه زى السكينه في الحلاوه

لحد ما في يوم ..... اعدة بتفرج على ماتش للاهلى ....ومركزة تركيز اننا نكسب بقه ومركزة ...مركزة

والماتش خلص وانا لسه برضو مركزة ........ بس مكسبناش

    قلقت شويه .بس لقيتنى بقول بصوت مهزوز لنفسى ...

( ايه يعنى ماهى لازم مرة تفلت منك انتى مش سوبر منة يعنى )

تانى يوم وانا رايحه الكليه الصبح ...كان بينى وبين الميكروباص 8 متر تقريبا ...وركزت اوى انه مش هيمشى ويسبنى انا متأخره ها

وقربت ..خلاص ...فاضل خطوة بس ...ها حطيت ايدى على ضهر الميكروباض اهه ..اوف ..اتنفست

وفجأه مشـــــى قبل ما اوصل للباب

أيــــــــــه .... انا مركزة والله !!!!!!!!!

لاقيتنى بقول كدة بصوت عالى جدا ...والناس بتبص عليا

هديت نفسى وكلمت طريقى ...وفى الطريق للكليه الى هو بياخد ساعتين تقريبا

اعدت اركز بقه ان لما اوصل متكونش استاذه اسماء في المطبعه ... وادخل واكتب اسمى في الغياب بقه

وفعلا ....بعد عناء ...وصلت الكليه ودخلت المطبعه _ مش موجودة _ لقيتنى بقولها بصوت عالى

.... ايوة بقه يا سوبر منـــــــــة .. ارجعى بقه يا شيخه

واعدت اردد جوايا  ....انتى مسيطرة يا منة ...انتى مسيطرة يا منة ...انتى مسي.......

ما لسه بدرى يا حلوة .... وازاى تدخلى من غير استأذان ....

ودى كانت استاذه اسماء

الى كانت وقفه اصلا في المكان الى انا بقعد فيه ....سعتها بلمت . وحسيت انى فقدت موهبتى  ورجعت منة العاديه تانى  .

    وبعد ما فوقت م الصدمه ...اعدت مع نفسى بقه ,

 موهبه ايه يا ام موهبه  انتى صدقتى نفسك ولا ايه

هو انتى تكدبى الكدبه وتصدقيها

وراجعت نفسى فكل الى حصل بقه ..عشان اعرف ليه كان بيحصل دة اصلا .. ولقيت الى كنت بدور عليه

الحاجه الى بسببها النور نور ( مخى اشتغل يعنى )

لقيت انى لما كنت بركز اوى ان حاجة تحصل او متحصلش ...كنت واهما نفسى بحوار التركيز دة

لكن لسانى بره .. عمال بيقول ( يارب ) ..يعنى كنت بدعى ربنا

أيــوة بقه ..ربنا ... اكيد طبعا هو مين ف ايده يقربلنا الحلو ويبعد عننا الوحش ..مين غيره يصحينا كل فتره بحاجه كدة عشان نتعدل ونمشى مظبوط .... يعنى ان كنت بدعى بس

دعيت ربنا ان بابا وماما ميكنوش في البيت وانا راجعه متأخرة عشان ميديقوش مش اكتر ...يعنى ربنا خرجهم عشانهم اليوم دة

    ولم كنت بركز ان بابا يطلع من غرفه العمليات كويس وان العمليه تنجح

اصلا اصلا كنت بدعى ..يعنى برضه عشانه وعشان خواتى وامى ..ربنا قومو بالسلامه ...

 يعنى ببساطه ربنا هو حل كل شئ سبحانه وتعالى

انما مش في الهيافه بقه ..!!!!!!!!

مش عشان ماتش كورة .. ولا عشان الميكروباص

انما بصراحه حوار استاذه اسماء انا كنت فعلا محتاجه ( القلم ) دة عشان احترم نفسى بقه وانزل بدرى

                           وبس

لما بتحصلنا حاجة ونفكر فيها بنطلع باستنتاجات كتير قوى بتقربنا من ربنا او بتقربنا من بعض

دة حاجة انا فكرت فيها ...وقلت اقولكوا عشان انتو كمان تفكروا ...فى  اى حاجة بتحصلكوا وتسيبوهاش تمر مرور الكرام كدة