سوبرإنسان

انت .. ايوة انت ياللي لقَفت المجلة وبتقرأ كلامي ..

نَاهيك عن الشرف اللي نولته بقرأه مقالتي كالفيرست ليدي بتاعة ألقُف , انت سوبرمان

مش بعاكسك ومصحف ربنا ..اسمع مني بس ,
 انت سوبر مان  قولي ليه ..قولتلي ليه استني اخلص السنداوتش دة بس واقولك ليه ,

انت قررت يا صديقي ترشق بدماغك ف تجربة جديدة مسمعتش عنها قبل كدة وقررت تلقُف أفكارنا المتوضعة جدا 
وتعملها قيمة عدم الامؤخذة وتقرا كلامنا وتهتم بينا ..

وهو يعني سوبرمان كان بيعمل ايه أكتر من انه بيشم المغامرات والتجارب الجديدة ويرشق فيها بدماغه من غير ما يخاف م النار تلسعه ولا  م الغاز يخنقة, 

وانت قررت تفتح ألقُف وتقرا أفكار الشباب اللي زيك من غير ما تخاف من ملل يصيبك ولا وقتك يضيع ع الفاضي
ولا تستسهل وتاخد المجلة تطلع عليها لامؤخذه .. بتشينجان

سوبرمان مش بس عشان قررت تلقُف " ألقُف " لا طبعا ..عشان اي حد ف الكوكب دة ممكن يبقى بسهولة جدا سوبرمان

و مش عشان الآسكيني الاشترشت الاحمر موضة الشباب دلوقتي لآ خالص ..اقولك سر ف ودنك " سوبرمان مش بلبسه اصلا"

ومش عشان سوبرمان لهطة قشطة ولا عشان هو أحسن مننا ..هو بس صدق وأمِن ..اعمل زيه

صدق انك قادر تطير قادر تعدي اسوار السجن الكبير قادر تكون انت مش حد تاني

امشي عكس الناس لو مقتنع إن دة طريقك ..طير عكس التيار لو حاسس,  الهوا مش هيموتك هيقّوي جذورك

لو لقيت نفسك قادر تكون مختلف وبس

قادر تعمل خير من غير ماتستني مقابل قادر تشجع افكار جديدة تشارك فيها تغير الكوكب إن شا الله تخليه " مربع "

قادر تتنفس حريه تحب بحريه تُبدع وتطلع إبدعاتك للناس بجرأة ...

سوبرمان جرئ طيب شجاع خلاّق ذكي ولماح ..سوبرمان ف الاول والآخر مجرد إنسان

خليك ديمـــا سوبرإنسان